旧时无线电视节目回顾

寻晚夜晚训唔着，个脑竟然係度上演旧时无线电视节目（包括剧集同动画）大回顾。“嘟”然想睇翻《开心华之里》。其实一直都对呢类情景喜剧情有独衷。好似比较成功同埋令人记得嘅有《卡拉屋企》，不过嗰班人又真係癫过头，唔係咁中意，不过都记得有吴镇宇、李婉华同埋楚原。讲翻《开心华之里》，呢部睇得唔多，净係记得米雪係入面扮傻更更嘅珠珠，想睇翻完全係因为想睇下当时无线流行用边个“咖呢啡”。睇得比较多嘅係之后嘅《餐餐有宋家》。金、银、富、贵四兄弟妹，仲记得有张凤梨，尹扬明扮“大旧金”。当时宣萱都仲係二线角色。成出戏最记得竟然係大结局成家人烧嘢食，啊，仲有一集讲复活节嘅。《餐餐有宋家》完咗后係《真情》接棒，呢出比较似正剧多D喔，后尾睇落又都唔错。係啊，好多人都觉得睇埋嗮呢D肥皂剧好冇营养，但是我就係中意喔，轻轻松松过半个钟，得啖笑都唔错，虽然都係傻更更，无喱头，不过好过辛苦咗成日仲要追四五角恋、争家产。嗰D斗智斗力嘅间中睇下就得，三线剧集都係佢好辛苦嘎。所以而家都会睇《皆大欢喜》《高朋满座》，反正集集内容唔同，唔中意嗰集就攞嚟冲凉咯。
嗰阵时係90年代中，觉得无线就係呢个时候嘅剧集最好睇（而家拍嗰D都唔知似D乜）。嗰阵时兴《笑看风云》《天地男儿》，算係当时嘅重头戏。长剧，又係讲商场上嘅嘢，人物多，关系仲要错综复杂。忠嘅白手起家，仲唔会行差踏错；奸人由头要俾人闹落尾，乜嘢阴质事都做得出。就好似以后嘅《创世纪》咁，唔同嘅係罗嘉良由奸变忠，担正做主角。嗰阵时小生兴张智霖、郑伊健、古天乐、何宝生（讲起佢就想睇翻《白发魔女传》），不过都係郑少秋陪衬（何宝生例外，未去过9点时段）。当时无线五虎有古天乐同古巨基。古巨基都有出场，不过都係扮懵懂少年，要经历冇乜前途，一事无成，冇乜人生方向，要屋企人执手尾嗰只。中午翻播嘅剧集最记得係黎明嘅《阿sir早晨》。唉！原来嗰排都兴李绮红喔。又有《兄兄我我》，呢出真係播过好多次。
动画片时兴嘅最记得《忍者乱太郎》，仲有乜《热血最强》《元气爆发》嗰D要变身合体嘅。以前朝早有好多动画片，仲有前一日《闪电传真机》重播。成个朝早到11点8之前都係儿童节目，有一出好似叫乜嘢日记（唔知係咪安妮），讲个女仔点样一个人适应好严嘅寄宿学校，中间少不了俾人杯葛情节。有《娱乐金鱼眼》（呢出我有DVD啊，广州话添），后尾连《将太的寿司》呢D都叫儿童节目，其中有一出又係讲整嘢食嘅，唔记得个名，净係记得入面有个类似有被虐狂嘅女人。下午动画有《俏皮幻法小花仙》，仲有嗰出嗌住“红豆沙，绿豆沙，点红点绿哗啦啦”嘅唔记得个名，之后有《天龙八部》（呢出唔係动画），之后係新一日《闪电传真机》（内含动画），之后就係经典中嘅经典，兴到我初中嘅《美少女战士》。嗰时《闪电传真机》未有唐纬琪等，鲁文杰都唔算最有分量嗰个，gary哥哥（唔记得佢中文名，姓蔡）仲未走，有好多佢嘅金曲。《忍者乱太郎》仲唱紧“开开心心看看原来天空这样美”，仲有陈奕、陈松龄嘅儿歌，嗰时嘅儿歌先叫儿歌金曲嘛，首首都识唱。最中意某个时期嘅星期四嘅《闪电传真机》，有个“科学实验室”环节。
综艺节目唔记得好多，反而记得隔离台嘅《今日睇真D》。记得有《花弗新世界》（我惗呢个都冇几多人记得），係咪有《最紧要好玩》（总之係楚原做主持嘅），最记得《K100》，嗰期係陈启泰，陈芷菁，莫可欣。好正经嘅《K100》，绝对冇吴家乐扮棵菜，罗敏庄扮阿婆，只係搵嘉宾上嚟讲下嘢。印象深刻嘅係探古天乐、李若彤《神雕侠侣》班，李若彤话古装讲嘢唔同，唔可以咁多“呃”、“哎”。之后再又咩《运财至叻星》、《奖门人》係后话。 而家都好少睇翡翠台噜，电视台竞争大。D节目你抄我，我抄佢;剧集嚟嚟去去嗰D情节唔单只，仲拍得求其。好想睇翻《猫猫日记》、《餐餐有宋家》、《壹號皇庭》。惗翻都觉得寻晚唔得闲，咁多嘢惗，唔怪得会训唔着。